எனக்கு விஷாலை ரொம்ப பிடிக்கும்; நடிகர் விக்ரமை காதலிக்கிறேன் என்று நடிகை ஸ்ரேயா கூறியுள்ளார். இதுதொடர்பாக அவர் கூறுகையில், சமீபத்தில் விக்ரம் நடித்த தெய்வத்திருமகள் படம் பார்த்து பிரமித்துப் போனேன். பிரமாதமாக நடித்திருந்தார். கந்தசாமி படத்தில் விக்ரமுடன் நடித்த அனுபவம் எனக்கு உண்டு. ஆனால் தெய்வத்திருமகள் அவரை, இன்னொரு உயர்ந்த இடத்துக்கு கொண்டு போய்விட்டது. அதில் அவரது கிருஷ்ணா கேரக்டர் அற்புதமாக இருந்தது. அவரை நான் காதலிக்கத் துவங்கி விட்டேன், என்றார்.
விஷால் பற்றி கூறுகையில், நான் பிரமித்த இன்னொரு ஹீரோ விஷால். அவர் நடித்த அவன் இவன் படம் எனக்கு ரொம்பப் பிடித்துவிட்டது. அவருக்கு நிச்சயம் விருது கிடைக்கும். அந்த அளவு அற்புதமாக நடித்திருந்தார், என்று பாராட்டியிருக்கிறார்.
விக்ரம், விஷாலை புகழ்ந்து தள்ளிய ஸ்ரேயா, நடிகைர் ஜீவாவையும் விட்டு வைக்கவில்லை. என்னுடைய இன்னொரு ஹீரோ ஜீவா. அவர் நடித்த கோ படம் பார்த்தேன். பிரமாதமாக இருந்தது. ஜீவா அசத்தலாக நடித்திருந்தார், என்று ஐஸ் வைத்திருக்கிறார்.
எந்த தகுதியும் இல்லாத மு.க.அழகிரி மத்திய அமைச்சராக இருக்கும்போது அனைத்து தகுதியும் உள்ள மருத்துவரான அன்புமணி அமைச்சராக இருக்க தகுதி உடையவர்தான் என்று தி.மு.க. முன்னாள் அமைச்சர் பொன்முடிக்கு பா.ம.க நிறுவனர் ராமதாஸ் பதில் அளித்துள்ளார்.
சென்னையில் இன்று செய்தியாளர்களுக்கு பேட்டி அளித்த அவர், தமிழகத்தில் தற்போது உள்ள கல்வி திட்டத்தில் ஸ்டேட் போர்டு,மெட்ரிகுலேஷன், ஆங்கிலோ இந்தியன்,ஓ.எஸ்.எஸ்.எல்.சி என நான்கு வகையான கல்வி முறை அமலில் உள்ளது. அவற்றை மாற்றி ஒரே கல்வி திட்டமாக அறிவித்து சமச்சீர்ப் பாடபுத்தகங்கள் வழங்கப்பட வேண்டும்.
தனியார் பள்ளிகள் அனைத்தையும் அரசு 99ஆண்டுகள் குத்தகைக்கு எடுத்து நடத்த வேண்டும்.தற்போது உள்ள சமச்சீர் கல்வியில் தரம் குறைவு என அரசு கூறிவருவதால் படிப்படியாக தரத்தை மேம்படுத்த நடவடிக்கை எடுக்கவேண்டும்.
அதேபோல் அமிதாப் நடித்த இந்தி படத்தில் இடஒதுக்கீடு பற்றி தவறாக சித்தரிக்கப்பட்டுள்ளது. மற்ற மாநிலங்களில் அந்த காட்சிகளை அகற்றிவிட்டு திரையிட்டதுபோல், இங்கும் திரையிட வேண்டும். உள்ளாட்சி தேர்தலுக்கு பிறகு தமிழகத்தில் உள்ள மதுக்கடைகளுக்கு பூட்டுப்போடும் போராட்டம் நடைபெறும்.
தி.மு.க முன்னாள் அமைச்சர் பொன்முடி பா.ம.க.வின் குடும்ப அரசியல் நடைபெறுவதாக குற்றம்சாற்றியுள்ளார். எந்த தகுதியும் இல்லாத மு.க.அழகிரி மத்திய அமைச்சராக உள்ளார். ஆனால் அனைத்து தகுதிகளையும் உள்ள மருத்துவரான அன்புமணி அமைச்சராக இருக்க தகுதி உடையவர்.
மேலும் அவர் மத்திய அமைச்சராக இருந்த போது 3 சர்வதேச விருதுகளை பெற்றியிருக்கிறார். இந்திய சுகாதார அமைப்பின் பாராட்டையும் பெற்றிருக்கிறார். 50ஆண்டுகளில் செய்ய வேண்டியதை 5ஆண்டுகளில் முடித்துள்ளதாக பிரதமர் பாராட்டியிருக்கிறார்.
அவைக்கு ஒரு நாள் கூட வராத அழகிரியை விட, அவை வழங்கிய ஒருமணி நேரத்தில் 55 நிமிடங்கள் அன்புமணி பேசியிருக்கிறார். இதுவரை நான் எந்தவித பதவியையும் வகிக்கவில்லை. பா.ம.க நிறுவனராக மட்டுமே உள்ளேன். அன்புமணியை தவிர எனது குடும்பத்தில் யாரும் அரசியலுக்கு வரவில்லை.
பொதுக்குழுவில் எடுக்கப்பட்ட தீர்மானத்தின்அடிப்படையில் பா.ம.க தலைமையில் தனி அணி அமைக்கப்பட்டு உள்ளாட்சி தேர்தலில் போட்டியிட உள்ளோம். இதுவரை மாறிமாறி திராவிட கட்சிகளை ஆட்சியில் அமரவைத்த பாவத்திற்காக மக்களிடம் மன்னிப்பு கேட்டு கொள்கிறேன்.
ராஜிவ் கொலையாளிகளாக குற்றம்சாற்றப்பட்டவர்களின் கருணை மனு நிராகரிக்கப்பட்ட நிலையில், தமிழக சட்டமன்றத்தில் தீர்மானம் நிறைவேற்றி மத்திய அரசுக்கு அனுப்பவேண்டும் என்று ராமதாஸ் கூறினார்.
என் இசை மக்களுக்கானது. அவர்களின் மகிழ்ச்சிதான் இந்த இசையின் முதல் நோக்கம் என்றார் இசைஞானி இளையராஜா.
இளையராஜா இசையில் உருவாகியுள்ள புதிய திரைப்படம் ஸ்ரீராம ராஜ்யம். இந்தப் படத்தை பாபு இயக்கியுள்ளார்.
அக்கினேனி நாகேஸ்வரராவ் வால்மீகியாகவும், பாலகிருஷ்ணா ராமராகவும் நயன்தாரா சீதையாகவும் இந்தப் படத்தில் நடித்துள்ளனர்.
ராமாயண காவியத்தின் உத்தரகாண்டத்தை மையமாக்கி உருவாக்கப்பட்டுள்ள படம் இது. ராவணனை வதம் செய்த பிறகு, ராமரின் ஆட்சிக் காலம் இந்தப் படத்தில் காட்சிப்படுத்தப்பட்டுள்ளன.
மிகப்பெரிய பட்ஜெட் படமாக உருவாகியுள்ள ஸ்ரீராமராஜ்யத்தின் சிறப்பம்சங்களில் ஒன்றாக இளையராஜாவின் இசை அமைந்துள்ளது. மொத்தம் 16 பாடல்கள் இந்தப் படத்தில் இடம்பெற்றுள்ளன.
ஸ்ரீசீதா ராமச்சந்திர சுவாமி கோயில் அமைந்துள்ள பத்ராச்சலம் நகரில் இந்தப் பாடல்கள் வெளியீட்டு விழா நடந்தது.
இசைஞானி இளையராஜா, அக்கினேனி நாகேஸ்வரராவ், பாலகிருஷ்ணா, நயன்தாரா உள்பட ஏராளமான திரையுலகப் பிரமுகர்கள் இந்த நிகழ்ச்சியில் பங்கேற்றனர்.
இளையராஜா தெலுங்கில் பேசினார். அவர் கூறுகையில், "இந்தப் படம் மிக முக்கியமான ஒன்று. என் இசை கடவுளுக்கானது என்று சொல்லமாட்டேன். இந்த இசை மக்களுக்கானது. அவர்கள் மகிழ்ச்சியாக இருக்க வேண்டும் என்பதற்காகவே இந்த இசையை உருவாக்கித் தருகிறேன். மக்கள் சந்தோஷமாக இருந்தால், இறைவன் சந்தோஷப்படுவான். இசையை விளக்குவது கஷ்டம். அனுபவிப்பது ஆனந்தம்.
இந்தப் படத்துக்கு மிகச் சிறந்த பாடல்களை எழுதியுள்ளார் ஜோன்னவிட்டலு. அவருக்கு என் நன்றி.
இந்த விழாவுக்கு வந்துள்ள அக்கினேனி நாகேஸ்வரராவைப் பார்க்கும்போது எனக்கு பழைய நினைவுகள். நான் மூன்றாம் வகுப்பு படித்துக் கொண்டிருந்த காலத்திலேயே அவர் படம் லைலா மஜ்னுவை எங்க ஊர் டெண்ட் கொட்டகையில் பார்த்து ரசித்தவன். அவர் படத்தில் மீண்டும் பணியாற்றியது சந்தோஷமாக உள்ளது.
இந்த ஸ்ரீராமராஜ்யம் குழுவுக்கு எனது வாழ்த்துக்கள்," என்றார்.
விழாவில் பேசிய நாகேஸ்வரராவ், "கவர்ச்சி பிகினி ஆதிக்கம் செலுத்தும் இந்த காலகட்டத்தில், இந்த வயதில் வால்மீகி வேடத்தில் நாம் நடிக்க வேண்டுமா என யோசித்தேன். ஆனால் தயாரிப்பாளர் தொடர்ந்து வற்புறுத்தியதால் ஒப்புக் கொண்டேன். இந்தப் படத்துக்கு இளையராஜா அற்புதமான பாடல்களைத் தந்துள்ளார். அவருக்கு என நன்றிகள்," என்றார்.
பேரறிவாளனை விடுதலை செய்யக் கோரி வேலூரில் மரணதண்டனை ஒழிப்பு கருத்தரங்கம் நடைபெற உள்ளது.
வேலூர் மாவட்டம் சோலையார் பேட்டையில் உள்ள சந்தை கோடியூரில் வரும் 22-ம் தேதி(சனிக்கிழமை) மாலை 3.00 மணிக்கு கேஜிஎஸ் திருமண மண்டபத்தில் "மரணதண்டனை ஒழிப்பு" மற்றும் "தூக்கு கொட்டடியிலிருந்து ஒரு முறையீட்டு மடல்" நூல் ஆய்வு கருத்தரங்கம் நடைபெற உள்ளது.
ராஜீவ் காந்தி கொலை வழக்கில் கைது செய்யப்பட்டு 20 வருடங்களுக்கு மேலாக மரணதண்டனை கைதியாக இருக்கும் பேரறிவாளனின் விடுதலையை வலியுறுத்தி "மரணதண்டனை ஒழிப்பு" மற்றும் "தூக்கு கொட்டடியிலிருந்து ஒரு முறையீட்டு மடல்" நூல் ஆய்வு கருத்தரங்கம் நடைபெறவுள்ளது.
இந்த கருத்தரங்கில் சீமான், (நாம் தமிழர் கட்சி தலைமை ஒருங்கிணைப்பாளர்), கொளத்தூர் த.செ.மணி, (தலைவர், பெரியார் திராவிடர் கழகம்), தமிழ் முழக்கம் சாகுல் அமீது, (மாநில ஒருங்கிணைப்பாளர், நாம் தமிழர் கட்சி), பேராசிரியர் சரசுவதி( தலைவர், பெண்கள் முன்னணி), வழக்கறிஞர் தடா சந்திரசேகர், வழக்கறிஞர் பிரிட்டோ (மனித உரிமை ஆர்வலர்) ஆகியோர் சிறப்புரை ஆற்றுகின்றனர்.
இந்த நிகழ்ச்சி பேரறிவாளனின் சொந்த ஊரில் நடைபெறுகிறது என்பது குறிப்பிடத்தக்கது.
ராஜீவ் காந்தி கொலையில் குற்றம் சாட்டப்பட்ட மூன்று பேருக்கும் தூக்குத் தண்டனை உறுதிப்படுத்தப்பட்டிருப்பது வேதனை தருகிறது. இதை ஆயுள் தண்டனையாக குறைக்க முதல்வர் ஜெயலலிதா நடவடிக்கை எடுக்க வேண்டும் என்று உச்சநீதிமன்ற முன்னாள் நீதிபதி வி.ஆர்.கிருஷ்ணய்யர் கோரியுள்ளார்.
இதுதொடர்பாக ஜெயலலிதாவுக்கு அவர் கடிதம் ஒன்றை அனுப்பியுள்ளார். அதில்,
இந்தியாவின் தலைமை நீதிமன்றத்தால் கொலைக்குற்றம் சாட்டப்பட்ட முருகன், சாந்தன், பேரறிவாளன் ஆகிய 3 பேரும் தூக்கிலிட போவதை அறிந்து மன வருத்தம் அடைந்தேன். அநியாயமாக கொல்லப்பட்ட ராஜீவ் காந்தியின் மனைவி சோனியா காந்தியும் இவர்களை கருணை அடிப்படையில் விடுதலை செய்ய உடன்படுவதாக கூறினார். ஆனால் தற்போது இவர்களைத் தூக்கிலிடலாம் என்று குடியரசுத் தலைவர் அனுமதி அளித்துள்ளது வருத்தம் தருகிறது.
இவர்களின் உயிரை காக்க தண்டனை குறைப்பு நடவடிக்கை எடுக்க தங்களை வேண்டுகிறேன். இந்த மனிதநேய செயலுக்கு உலகம் முழுவதும் உள்ள தமிழர்கள் தங்களுக்கு நன்றிக் கடன்பட்டவர்களாக இருப்பர் என்று கிருஷ்ணய்யர் கூறியுள்ளார்.
காங்கிரஸ் தலைவர்களையும் தொண்டர்களையும் இழிவுபடுத்தி பேசி வரும் நாம் தமிழர் கட்சித்தலைவர் சீமான் நடவடிக்கை எடுக்க வேண்டும் என்று கோரி இளைஞர் காங்கிரஸ் தலைவர் யுவராஜ், டிஜிபி ராமானுஜத்திடம் மனு கொடுத்துள்ளார்.
இதுகுறித்து மனு கொடுத்து விட்டு வந்த பின்னர் செய்தியாளர்களிடம் பேசிய யுவராஜ் கூறுகையில்,
விடுதலைப்புலிகள் இயக்கத்தை ஆதரித்தும், அகில இந்திய காங்கிரஸ் தலைவர்களையும், தொண்டர்களை இழிவுபடுத்தியும் சீமான் பிரசாரம் மேற்கொண்டு வருகிறார்.
இது குறித்து கடந்த 15 நாட்களுக்கு முன்பு சென்னை போலீஸ் கமிஷனரிடம் புகார் மனு கொடுத்தோம். சீமான் மீது எந்த நடவடிக்கையும் இதுவரை எடுக்கப்படவில்லை.
ராஜீவ்காந்தி கொலைவழக்கில் நீதிமன்றத்தால் தூக்குதண்டனை விதிக்கப்பட்டவர்களை நிரபராதிகள் என்று பேசி வருகிறார்கள். இதை நாங்கள் ஒரு போதும் ஏற்றுக்கொள்ளமாட்டோம். உடனடியாக அவர்களை தூக்கிலிடவேண்டும். நீதி மன்றத்தில் விதிக்கப்பட்ட தீர்ப்பை பொதுக்கூட்டத்தில் விவாதிக்கக்கூடாது என்று போலீஸ் டி.ஜி.பி.யிடம் மனு கொடுத்துள்ளோம்.
இது பற்றி பரிசீலனை செய்து நல்ல முடிவு எடுக்கப்படும் என்று அவர் பதில் அளித்தார். சீமான் வன்முறையை தூண்டும் வகையில் பேசுகிறார். இதே போக்கு நீடித்தால் தமிழகத்தில் சட்டம்-ஒழுங்கு கெடுவதற்கு வாய்ப்பு உள்ளது. இலங்கை தமிழர்களுக்கு என்றும் ஆதரவாக இருப்போம்.
அதே நேரத்தில் எங்களுக்கு விடுதலை புலிகள்தான் எதிரானவர்கள். ராஜீவ்காந்தியை கொலை செய்தவர்களை குற்றவாளியாக பார்க்கவேண்டும்.
தமிழர்களின் உணர்வுகளை இதில் சேர்க்கவேண்டாம். சீமான் மீது போலீசார் நடவடிக்கை எடுக்காவிட்டால் நிச்சயமாக அடுத்தகட்டமாக தகுந்த பதில் அடி கொடுப்போம். இளைஞர் காங்கிரசை பொறுத்தவரை அமைதியாக இருக்க மாட்டோம் என்றார்.
முன்னதாக சத்தியமூர்த்தி பவனிலிருந்து டிஜிபி அலுவலகத்திற்கு ஊர்வலமாக வந்தனர் காங்கிரஸார். அவர்கள் கொடுத்த மனுவில்,
ராஜீவ்காந்தி கொலைவழக்கில் சம்பந்தப்பட்ட 3 பேருக்கு நீதிமன்றத்தால் விதிக்கப்பட்ட தூக்குதண்டனைக்கு எதிராகவும், தூக்குதண்டனை கைதிகளை ஆதரிப்பதும் நீதிமன்ற அவமதிப்பு செயலாகும். ராஜீவ்காந்தி படுகொலை தூக்குதண்டனை கைதிகளை விடுவிக்க வேண்டும் என்று இன்று குரல் கொடுப்பவர்கள் நாளை அப்சல் குருவையும் விடுவிக்க வேண்டும் என்று குரல் கொடுக்க தயங்க மாட்டார்கள்.
இலங்கை தமிழர் பிரச்சினையில் தமிழக அரசின் நிலைமையை காரணமாக கொண்டு தமிழகத்தில் விடுதலைப்புலிகள் ஊடுருவி அதனால் வெடிகுண்டு கலாசாரம் பரவும் சூழ்நிலை ஏற்பட்டுள்ளது.
விடுதலைப்புலிகளை ஆதரிக்கும் தமிழர் விடுதலைப்படையை சேர்ந்த 2 பேர் பயங்கரமான வெடிகுண்டு தயாரிப்பதற்கான டெட்டனேட்டருடன் சென்னையில் கைது செய்யப்பட்டுள்ளனர்.
ராஜீவ்காந்தி படுகொலைக்கு காரணமான தூக்குதண்டனை கைதிகளை ஆதரித்து சென்னையில் நாம் தமிழர் கட்சி மற்றும் பெரியார் திராவிடர் கழகம் சார்பில் பொதுக்கூட்டம் நடத்த போலீசார் வழங்கிய அனுமதியை ரத்துசெய்யவேண்டும். பொதுக்கூட்டத்திற்கு தடையும் விதிக்கவேண்டும் என்று கோரியுள்ளனர் காங்கிரஸார்.
உண்மையாக ஊழலுக்கு எதிரான போராட்டம் நடப்பதானால் அது தமிழ் நாட்டிலும் நடக்க வேண்டும். ஏனென்றால் 2ஜி ஊழலைவிட பெரிய ஊழல் இந்தியாவில் இருக்க முடியாது.அப்படியிருக்க ஊழலுக்கு எதிரான போராட்டம் தமிழகத்தில் பாரிய சலசலப்பை ஏற்படுத்தவில்லை. தமிழக மக்கள் மு.கருணாநிதி ஆட்சிக்கு கொடுத்த தண்டனை முடிந்துவிட்டதால் அது முனைப்படையவில்லையா என்பது முக்கிய கேள்வி : இது குறித்த கட்டுரை :
அன்னா ஹஸாரேவின் போராட்டத்துக்கு இந்தியாவின் பெரும்பாலான பகுதிகளில் பெரும் ஆதரவு காணப்படுகிறது. அவருக்காக ஆயிரக்கணக்கானோர் தெருக்களில் இறங்கி போராடிக் கொண்டிருக்கின்றனர். ஆனால் தென்னிந்தியாவில் அப்படி ஒரு எழுச்சியைக் காண முடியவில்லை. குறிப்பாக தமிழகம், கேரளாவில் அதைக் காண முடியவில்லை. இது ஏன்?
ஊழலை ஒழிக்க வேண்டும், அதற்காக வலுவான லோக்பால் சட்டத்தை உருவாக்க வேண்டும் என்பதே ஹஸாரே குழுவினரின் கோரிக்கையாக உள்ளது. இந்தக் கோரிக்கைக்காக கடந்த சில மாதங்களாக அவர்கள் இடைவிடாமல், தீவிரமாக போராடி வருகின்றனர். எத்தனை அடக்குமுறைகள் வந்தபோதும் விடாமல் போராடி வருகின்றனர். இதனால்தான் மக்கள் மத்தியில் அவர்களுக்கு பெரும் ஆதரவு கிடைத்து வருகிறது.
ஆனால் இந்தப் போராட்டத்துக்கு இந்தியாவின் பெரும்பாலான பகுதிகளில் காணப்படுவதைப் போன்ற எழுச்சி தமிழகத்திலும், கேரளாவிலும் அவ்வளவாக இல்லை. ஆந்திராவிலும் கூட பெரும் அலையைக் காண முடியவில்லை. கர்நாடகத்தில் கூடஓரளவுக்கு போராட்டங்கள் நடந்து வருகின்றன. இதற்கு என்ன காரணம் என்பது புரியவில்லை.
இருப்பினும், ஆரம்பத்திலிருந்தே அன்னா ஹஸாரேவின் போராட்டம் ஏதோ வட இந்தியர்களின் போராட்டம் போலவே காட்சி அளித்து வருகிறது, பார்க்கப்பட்டு வருகிறது. இது ஒரு காரணமாக இருக்கக் கூடும்.
அன்னா ஹஸாரே குழுவினரின் போராட்டம் குறித்து இரு விதமான கருத்துக்கள் ஆரம்பத்திலிருந்தே இருந்து வருகின்றன. ஹஸாரேவின் போராட்டத்தை தீவிரமாக ஆதரிப்போர் ஒருபக்கமும் இருக்கும் நிலையில், அவரை கடுமையாக விமர்சிப்போரும் கணிசமாக உள்ளனர் என்பதை மறுக்க முடியாது.
அன்னா ஹஸாரே குழுவில் இடம் பெற்றுள்ள முக்கியஸ்தர்கள் பலரும் வட இந்தியர்களே அல்லது அன்னா சார்ந்த மகாராஷ்டிராவைச் சேர்ந்தவர்களாக உள்ளனர். தென்னிந்தியர் என்று பார்த்தால் சந்தோஷ் ஹெக்டே மட்டுமே அதில் இடம் பெற்றுள்ளார். இருப்பினும் அவரும் கூட ஆரம்பத்தில் இருந்ததைப் போல இப்போது தீவிரமாக அவர்களுடன் சேர்ந்து போராட்டங்களில் ஈடுபடுவதில்லை.
தென்னிந்தியாவில் ஏராளமான புகழ் பெற்ற மனித உரிமை ஆர்வலர்கள், காந்தியவாதிகள் உள்ள போதிலும் அவர்களையும் தங்களுடன் இணைத்து செயல்பட, தென்னிந்தியாவிலும் பேரெழுச்சியை உருவாக்க அன்னா ஹஸாரே குழு தவறி விட்டதோ என்று தோன்றுகிறது.
தேசிய அளவில் பெரும் பாதிப்பை ஏற்படுத்தக் கூடியவகையில் போராடக் கூடியவர்கள் தென்னிந்தியர்கள் என்பது கடந்த காலங்களில் பலமுறை நிரூபிக்கப்பட்டுள்ளது. இந்தி எதிர்ப்புப் போராட்டம் இந்தியாவின் பிற பகுதிகளை விட தமிழகத்தில்தான் மிகப் பெரிய அளவில் நடந்தது.அதனால் நேருவே பணிய நேர்ந்தது என்பது வரலாறு.
அதேபோல பல்வேறு தேசியப் பிரச்சினைகளில் தென்னிந்தியர்கள், பிற இந்தியர்களுக்கு சற்றும் குறைந்தவர்கள் இல்லை என்பதை பலமுறை நிரூபித்துள்ளனர். ஆனால் இந்தமுறை அன்னா ஹஸாரேவின் போராட்டத்துக்கு தென்னிந்தியாவில் பேரெழுச்சியைக் காண முடியவில்லை என்பதே உண்மை.
தென்னிந்தியர்களின் இந்த அமைதிக்கு என்ன காரணம் என்பது தெளிவாகத் தெரியவில்லை. இருப்பினும் புரியாத போராட்டமாக அன்னாவின் போராட்டத்தை தென்னிந்திய மக்கள் பார்க்கிறார்களோ என்ற கேள்வியும் எழுகிறது.
இதுவே கார்கில் போரின்போது இந்தியாவின் எந்தப் பகுதியையும் விட தென்னிந்தியாதான் குறிப்பாக தமிழகம்தான் அதிகம் கொதித்தது, கொந்தளித்தது, குமுறியது. கார்கில் போர் வீரர்களுக்காக நிதி திரட்டியபோது தமிழக மக்கள்தான் மிகப் பெரிய அளவில் அள்ளிக் கொடுத்து தேச பக்தியை வெளிப்படுத்தினர். கார்கில் போர் அவர்களுக்குப் புரிந்தது. அன்னாவின் ஊழலுக்கு எதிரான போர் தமிழக மக்களுக்கு புரியாமல் போனதற்கு என்ன காரணம் இருக்க முடியும் என்பது புரியவில்லை.
அதேசமயம் அன்னா ஹஸாரே குழுவினர் யாருமே ஆங்கிலத்தில் பேசுவதில்லை.மாறாக சுத்தமான, இந்தியில்தான் பேசிக் கொண்டிருக்கிறார்கள். இந்தியில் பேசுவதில் தவறில்லை. ஆனால் அவர்கள் பேசுவது அனைவருக்கும், குறிப்பாக தென்னிந்தியாவில், அதிலும் குறிப்பாக தமிழகத்தில் இந்தி தெரியாதவர்களுக்கும் புரியும் வகையி்ல இருந்திருந்தால் ஒருவேளை எழுச்சி அதிக அளவில் இருந்திருக்கலாமோ என்னவோ.
அன்னா ஹஸாரேவின் போராட்டம் மக்களிடையே மேலும் நெருக்கமாக சென்றடைய இந்த பாஷைப் பிரச்சினையும் ஒரு காரணமோ என்னவோ தெரியவில்லை. முழுக்க முழுக்க இந்தியிலேயே தலைவர்கள் பேசி வருவதால் இதை இந்திக்காரப் பிரச்சினையாக தமிழக மக்கள் கருத வாய்ப்பு உள்ளது.
மொத்தத்தில் இந்தியாவில் மிகப் பெரிய எழுச்சிய அன்னாவின் போராட்டம் ஏற்படுத்தியுள்ளது என்பதில் சந்தேகமே இல்லை. ஆனால் நடமாடும் காந்தி என்று அன்னாவைக் கூறும் அவரது ஆதரவாளர்கள், காந்தியைப் போலவே நாடு முழுவதும் சென்றடையும் வகையில் தனது கருத்துக்ளுக்கு நாடு தழுவிய ஆதரவைப் பெறத் தவறி விட்டார் அன்னா என்பதும் மறுக்க முடியாத உண்மை
திருகோணமலை நகரில் அமைந்துள்ள இந்து மயானத்துக்குள் விபச்சாரம் இடம்பெறுவதாக கொழும்பிலிருந்து வெளிவரும் இருக்கிறம் பத்திரிகை பட ஆதாரங்களுடன் தகவல்களை வெளியிட்டுள்ளது. இது தொடர்பாக திருகோணமலை இந்து இளைஞர் பேரவையின் செயலாளர், திருகோணமலை நகர சபை செயலாளர் ஆகியோர்களிடம் கருத்துக்களைக் கேட்டறிந்து இருக்கிறம் இத்தகவல்களை உறுதிப்படுத்தி வெளியிட்டிருக்கிறது. இந்தவாரம் வெளியாகியிருக்கின்ற இப்பத்திரிகையிலேயே இக்கட்டுரை வெளியாகியுள்ளது.
திருகோணமலை நகரிலிருந்து நிலாவெளி செல்லும் பிரதான வீதியில் திருகோணமலை இந்து மயானம் அமைந்துள்ளது. நகர சபை எல்லைக்குள் உள்ள இருபத்தையாயிரத்துக்கும் அதிகமான இந்து மக்கள் பயன்படுத்தும் ஒரே இந்து மயானம் இதுவாகும். இங்கு காணப்படும் குறுகிய பரப்பளவிலேயே, நகரத்தில் பெரும்பான்மையாக வாழும் இந்துக்களின் நல்லடக்கங்களும் தகனக் கிரியைகளும் கடந்த பல ஆண்டுகளாக நிகழ்ந்து வந்தன. இந்நிலையில் கடந்த 2010ம் ஆண்டு நிக்கோட் நிறுவனத்தின் உதவியுடன் சுமார் எட்டு மில்லியன் ரூபா செலவில் எரிவாயுவினால் இயங்கும் தகனக்கூடம் ஒன்று அமைக்கப்பட்டது. கடந்த ஆண்டு ஜீலை 15ஆம் திகதி உத்தியோகபூர்வமாக மக்கள் பாவனைக்கு விடப்பட்டது. திருகோணமலை மாவட்டத்தில் முதலாவதாக அமைக்கப்பட்டதும் இன்றுவரை காணப்படுவதுமான ஒரே தகனக்கூடம் இதுவாகும்.
ஆனால் வருட ஆரம்பத்தில் திருகோணமலையில் ஏற்பட்ட வெள்ளத்தின் போது இந்த இயந்திரத்தில் உள்ள மோட்டார் ஒன்று பழுதடைந்துவிட்டது. அதனால் ஜனவரி 24ஆம் தகதியிலிருந்து இத்தகனக்கூடம் பாவனைக்குட்படுத்தப்படாது உள்ளது. திருகோணமலை நகரசபையின் சபைக்கூட்டத்தில் இது கவனத்திற்கு கொண்டு வந்த போதும் இதற்கான நடவடிக்கை மேற்கொள்ளப்படாதது திருமலை மக்களை விசனமடைய வைத்தது.
அத்துடன் இந்த வாயு தகனக்கூடத்தை தொழிநுட்ப ரீதியாக இயக்கும் உத்தியோகத்தர் இது தொடர்பான பயிற்சி ஏதும் பெற்றிறாதவர் என்பதுடன் நகர சபையின் சுகாதாரத் தொழிலாளிகளே இதனை இயக்கும் பரிதாப நிலையும் இங்கு காணப்பட்டு வந்தது. பிற மாவட்ட வாயு தகனக்கூடங்களைப்போல் இவ்விடம் சுகாதாரமாகவோ துப்பரவாகவோ காணப்படுவதில்லை.
அவ்விடத்தால் செல்லும் போது முகத்தை சுளிக்கும் நிலையிலேயே இந்தச் சூழல் காணப்படுகின்றது. அத்துடன் தகனம் செய்யப்படும் உடல்களின் எச்சங்களும் மிருகங்களால் இழுத்துச் செல்லப்பட்டு ஆங்காங்கே கிடப்பது அருவருப்பைத் தருகிறது. ஒரு நாளைக்கு அண்ணளவாக இரண்டுக்கும் மேற்பட்ட நல்லடக்கங்கள் இடம்பெறுகின்றன. இருந்தும் பராமரிப்பற்ற நிலையிலேயே இம் மயானம் காணப்படுகின்றது.
இந்த மயானத்தை பராமரிக்கும் பணியானது திருகோணமலை மாவட்ட இந்து இளைஞர் பேரவையின் பொறுப்பிலேயே கடந்த பல வருடங்களாக இருந்தது. இதில் அவர்கள் வருடாந்தம் ஒரு சிரமதானப் பணியினை நிகழ்த்துவது வழக்கம் தற்போது இப்பணி தொடர்கின்றதா என்பது கேள்விக்குறியாகவே உள்ளது.
இவை எல்லாவற்றையும் விட கொடுமை என்ன தெரியுமா? மயானக் காவலாளியாக பணிக்கமர்த்தப்பட்டவருக்கு ஒரு தங்குமிடம் உள்ளது. இதில் அவருடைய உறவினர்கள் எனும் பெயரில் கிட்டத்தட்ட பத்துக்கும் மேற்பட்டவர்கள் வசித்து வருகிறார்கள். இதிலே உள்ளவர்களில் சிறுவர்களும் பெண்களுமே அதிகமாக இருந்தாலும் அப் பெண்களோ கடந்த பல வருடங்களாக பாலியல் தொழிலில் ஈடுபட்டுவருவது அப்பிரதேசத்தவர்கள் எல்லோரும் அறிந்ததே.
ஆனாலும் இவர்கள் அடிக்கடி பொலிஸாரால் கைது செய்யப்படுவதும் பின்னர் விடுவிக்கப்படுவதும் வழமையான ஒன்றாகும். ஆனால் அவர்கள் தண்டனை பெற்று சிறிதுகாலத்தில் வெளியில் வந்துவிடுவார்கள். இனி என்ன.. பழைய குருடி கதவை திறடி கதைதான். இவர்களுக்கு பிறக்கும் குழந்தைகளுக்கு என்ன நடக்கின்றது என்பது யாருக்கும் தெரியாத மர்மமாகவே காணப்படுகின்றது. கடந்த ஜீன் மாதம் மேற்படி மயானப்பகுதியில் ஒரு பெண்ணின் சடலம் கண்டுபிடிக்கப்பட்டது. அது ஏற்கனவே மயானத்தை பராமரித்து வந்த காவலாளியின் மனைவியின் சடலம் என இனம் காணப்பட்டு தற்போது விசாரணைகள் முன்னெடுக்கப்பட்டு வருகின்றன.
இது தொடர்பாக இந்து இளைஞர் பேரவையின் செயலாளர் செ. விஜயசுந்தரம் அவர்களை தொலைபேசியில் தொடர்புகொண்டு கேட்டோம். 'நாங்கள் தான் ஒரு காவலாளியை வைச்சனாங்கள். அவர் தவறான வழிக்கு போனதால நாங்க அவரை நிற்பாட்டிட்டம். காவலாளிக்கு உரிய பாதுகாப்பு வீட்டை நாங்கள் பூட்டுப்போட்டு பூட்டினோம். கோபத்தில் அவர் பாதுகாப்பு படையினரின் உதவியோட அதை உடைச்சி அதுல கொஞ்சம் பொம்புளைகள வைச்சி விபச்சாரம் செய்துகொண்டிருக்கிறார்.
இது சம்பந்தமாக நாங்கள் பொலிஸிற்கு அறிவிச்சனாங்கள. இங்கு விபச்சாரம் நடக்குது அதை நிற்பாட்டுங்க எண்டு நாங்கள் பதிவுத் தபாலில திருகோணமலை சிரேஸ்ட பொலிஸ் அத்தியேட்சகர் (நநட) க்கு ஒரு கடிதம் அனுப்பினம். ஒரு பதிலும் இல்ல. அந்த இடத்துக்கு பாதுகாப்புப் பணியில இருக்கிற ஆக்கள்தான் விபச்சாரத்துக்கு போறாங்கள். இந்து மயானமும் ஒரு சிங்களப் பகுதியை அண்டித்தான் இருக்குது.
அங்க இருக்கும் சிங்கள ஆக்கள் மற்றும் பாதுகாப்பு படையில உள்ளவங்க சம்மந்தப்பட்டுத்தான் இது நடக்குது. இப்ப அதுக்கு ஒரு பிரதான கேட் ஒன்றைச் செய்து போட இருக்கிறம். ஏற்கெனவே அந்த வீட்டை பூட்டு போட்டு பூட்டினம். திரும்பி உடைச்சிப் போட்டு அதுக்குள்ள இருக்கிறாங்கள். என்றவரை மறித்து இந்த அத்துமீறல் தொடர்பாக குறிப்பிட்ட பெண்களுடன் கதைத்தீர்களா? என்று கேட்டோம்.
நான் ஒருநாள் அந்தப் பகுதிக்கு போனனான். அங்க இருந்த பொம்புளைகள் என்னக் கண்டு ஓட வெளிக்கிட்டவங்கள். அப்ப அங்க இருந்த காவலாளி சில ஆக்களுக்குச் சொல்லி அவங்க என்னையும் துரத்த வெளிக்கிட்டவங்கள். அதுக்குப் பிறகு நானும் அந்த பக்கம் போறதில்ல. 40, 50 வருடங்களாக நாங்க இந்த மயானத்த நிர்வகிச்சுக்கொண்டு வாறம். இப்போ என்ன செய்யிறதெண்டு தெரியாம ஒரு இக்கட்டான நிலைமையில இருக்கம்' என்று தெரிவித்தார்.
இப்பிரச்சினை தொர்பாக நாம் திருகோணமலை நகர சபை செயலாளர் அ.க.ங. நஃபீல் அவர்களின் கவனத்திற்கு கொண்டுவந்தோம். 'இவ்வளவு காலமும் இந்து மயானத்தை இந்துப் பேரவைதான் நிர்வகித்துக்கொண்டு வருகின்றது. அதை அபிவிருத்தி செய்யவேண்டும் என்று ஒரு திட்டத்தை நகர சபை தலைவர் கொண்டு வந்திருக்கிறார். அதன் அடிப்படையில் இதனை நாங்கள் கையேற்று அதனை நிர்வகிப்போம்.
இப்போதும் சிரமதான பணிகளை முன்னெடுக்கின்றோம். உள்ளுராட்சி வாரத் திட்டத்துக்குக் கீழ் இதனை உள்வாங்கியிருக்கிறம். இதன் அடிப்படையில் மரங்களை நட்டு சிரமதானம் செய்து அதனை நல்ல நிலைக்கு கொண்டுவருவதற்கான நடவடிக்கைய எடுக்கிறம். அதேநேரம் பாதுகாப்பு உத்தியோகத்தரையும் எங்கள் நகரசபையால நியமித்து நிர்வகிக்க நடவடிக்கை எடுக்கிறம். பொதுமக்கள் எங்களிடம் முறையிடுகின்றனர். நாங்கள் தலைவரின் கவனத்திற்கு இவ்விடயங்களை கொண்டு வந்திருக்கிறம். கூடிய விரைவில் அதனை நாங்கள் பொறுப்பேற்று எங்களது கட்டுப்பாட்டின் கீழ் கொண்டுவரவிருக்கிறோம்' என்று தெரிவித்தார்.
தினமும் ஆயிரக்கணக்கான பொதுமக்கள், அதிகாரிகள், அரசியல் தலைவர்கள் பயணம் செய்யும் வீதியில் இவ்வாறான பராமரிப்பற்ற மயானம் இருப்பதும் ஆச்சரியத்தை தருகின்றது. அதுமட்டுமல்ல மயானத்தையும் விட்டுவைக்காமல் அங்கு பிணத்துக்கு மேலே விபச்சாரம் நடாத்துகின்றனர்.
நாட்டைக் காக்கும் பாதுகாப்புப் படையினரும் இதற்கு உடந்தையாக இருப்பது என்ன ஒரு அநியாயம்? பொலிஸாரின் கவனத்திற்கு கொண்டுவந்தும் இது தொடர்பான நடவடிக்கை எடுக்கப்படாதது பொலிஸாரின் மேல் நம்பிக்கையீனத்தைத் தோற்றுவித்திருக்கிறது. நகர சபை செயலாளர் கூறியதைப்போல் விரைவில் இவ்வாறான சமூகசீரழிவுக்கு முடிவுகட்டப்படுமா என்று பொறுத்திருந்துதான் பார்க்கவேண்டும்.
திருமலை ராஜ்
நன்றி: "இருக்கிறம்"
யாழ்.மாவட்டத்தில் இளவயது கர்ப்பந்தரித்தல் தொடர்ச்சியாக அதிகரித்து வருவதாக அந்த மாவட்டத்தின் சுகாதாரப் பணிமனை தெரிவிக்கிறது.
யாழ். குடாநாட்டில் 2011 ஆம் ஆண்டு ஜனவரி மாதம் முதல் மே மாதம் வரையிலான ஐந்து மாத காலப்பகுதியில் 211 இள வயதினரும்; திருமணமாகாத பெண்கள் 69 பேரும் கர்ப்பம் தரித்துள்ளதாக புள்ளிவிபரங்கள் தெரிவிக்கின்றன.
இதேவேளை, இந்த ஐந்து மாத காலப்பகுதியில் சிறுவர் துஷ்பிரயோகம் தொடர்பாக 242 முறைப்பாடுகள் பதிவாகியுள்ளன. யாழ். மாவட்ட சுகாதார பணிமனையின் தாய்சேய் நல வைத்திய அதிகாரி திருமதி.தி.சிவசங்கர், கலாசார சீர்கேடுகள் குறித்து தமது கவலையையும் வெளியிட்டார்.
எந்த தகுதியும் இல்லாத மு.க.அழகிரி மத்திய அமைச்சராக இருக்கும்போது அனைத்து தகுதியும் உள்ள மருத்துவரான அன்புமணி அமைச்சராக இருக்க தகுதி உடையவர்தான் என்று தி.மு.க. முன்னாள் அமைச்சர் பொன்முடிக்கு பா.ம.க நிறுவனர் ராமதாஸ் பதில் அளித்துள்ளார். 
ஆளுநரின் உத்தரவு கிடைத்த 7ம் நாள் ராஜீவ் கொலையில் தூக்கு தண்டனை விதிக்கப்பட்ட முருகன், சாந்தன் மற்றும் பேரறிவாளன் ஆகியோரை வேலூர் சிறையில் தூக்கிலிடுவோம் என்று சிறைத்துறை இயக்குனர் கூடுதல் டி.ஜி.பி டோக்ரா தெரிவித்துள்ளார். 
தொல்காப்பியம் குறைந்தது 7000 ஆண்டுகளுக்கு முன்னரே எழுதப்பட்ட நூல் என்று 900க்கும் மேற்பட்ட ஆதாரங்களை மேற்கோள் காட்டி அறிஞர் குணா எழுதிய தொல்காப்பியத்தின் காலம் என்ற நூல் வெளியீட்டுவிழா திரு. அரிமாவளவன் தலைமையில் சென்னையில் நடந்தது. 
கருணை மனுவை குடியரசுத் தலைவர் நிராகரிக்க, மரணத்தின் விளிம்பில் நிற்கிறார் பேரறிவாளன். தன் மகனுக்காக, சட்டத்தின் அத்தனை கதவுகளையும் தட்டித் தட்டி சோர்ந்து கிடக்கிறார் அந்தத் தாய் அற்புதம் அம்மாள்! 
